கேரளாவில் நிபா வைரஸால் 2 பேர் உயிரிழந்ததைத் தொடர்ந்து, வைரஸ் பரவாமல் தடுக்கும் வகையில், பள்ளிகளை மூடி, பரிசோதனை செய்து வருவதாகக் கேரள முதல்வர் பினராயி விஜயன் தெரிவித்துள்ளார்.
உலக சுகாதார அமைப்பின் (WHO) கூற்றுப்படி, நிபா என்பது ஜூனோடிக் வகை வைரஸ் ஆகும். இது விலங்குகளிடமிருந்து மனிதர்களுக்குப் பரவுகிறது. நோயின் அறிகுறிகளில் தலைவலி மற்றும் தூக்கமின்மை ஆகியவை அடங்கும், இது சில நாட்களில் கோமா நிலைக்கு முன்னேறும் என்று அமெரிக்க நோய் கட்டுப்பாடு மற்றும் தடுப்பு மையம் அறிவித்துள்ளது.
இது கடுமையான சுவாச நோய்க்குறியை ஏற்படுத்துகிறது, இதற்குத் தடுப்பூசி இல்லை. இதுவரை 700க்கும் மேற்பட்டோருக்கு வைரஸ் பரிசோதனை செய்யப்பட்டுள்ளதாகக் கேரள மாநில சுகாதாரத்துறை அமைச்சர் வீனா ஜார்ஜ் செய்தியாளர்களிடம் தெரிவித்தார்.
கேரளாவில் 2018-ம் ஆண்டு நிபா வைரஸால் 17 பேர் உயிரிழந்தனர். 2021 ஆம் ஆண்டில், 12 வயது சிறுவன் வைரஸால் இறந்தான். நிபா வைரஸ் முதன்முதலில் மலேசியாவில் 1998-1999 இல் கண்டறியப்பட்டது. மலேசியாவில் உள்ள கம்போங் சுங்கை நிபா என்ற கிராமத்தில் பன்றி வளர்ப்போர் இந்த நோயால் பாதிக்கப்பட்டதால் இந்த வைரஸுக்கு நிபா என்று பெயரிடப்பட்டது.
நிபா வைரஸ் மனிதர்களிடம் இருந்து மனிதர்களுக்குப் பரவுவதாகவும் தெரிவிக்கப்பட்டுள்ளது. 2001 மற்றும் 2008 க்கு இடையில், பங்களாதேஷில் பதிவாகிய பாதி வழக்குகள், பாதிக்கப்பட்ட நோயாளிகளுக்குச் சிகிச்சை அளிக்கும் பணியாளர்களுக்குப் பரவியதாக WHO தெரிவித்துள்ளது.
